Quran wa hadees se saboot Ambiya E kiram apni apni Qabron me zinda hain.

Quran wa hadees se saboot Ambiya E kiram apni apni Qabron me zinda hain.

◆Sar ke jism se alag hone aur rooh ke badan se juda hone ke baad bhi Allah Ta’ala ne Shahidon ko Murda kahne balki sochne  se bhi mana farmaya aur saaf lafzon me farmaya ki woh zinda hain.Is me kisi ko shak nahi ki ambiya-e-Kiraam ka darja shahidon se bahut badh ke hai.Is liye jab shahidon ke inteqaal kar jaane ke baad bhi un ko murda kahna durust nahi to ambiya-e-Kiraam ko murda kahna aur bhi durust nahi hoga.Ye ek khuli haqiqat hai magar phir bhi kuch log is mas’ale ko le kar aapas me ulajhte rahte hain.Is liye yahan par Is mas’ale ki haqiqat ko Musalmano ko sahi raasta batane ki niyat se Quran aur sahi hadiso ki raushni me pesh kiya jaata hai.

 ◆Sawal :Ambiya-e-Kiraam inteqaal ke baad zinda hain ya murda?

 ◆Jawab: Allah Ta’ala ka waada hai ki Har jaan ko maut ka maza chakhna hai.Is waade ke mutabiq ambiya-e-kiraam ko bhi ek lamha ke liye maut aai lekin phir Allah Ta’ala ne unhe aisi zindagi ata farmaai jo is dunyawi zindagi se bhi laakhon darja behtar hai.Is liye Allah ke nabi apni apni qabron me zinda hain, Rozi diye jaate hain, Namaaz padhte hain, ziyarat karne walo ke salaam ka jawab dete hain aur mukhtalif jaghon par aate jaate hain wagairah.

 ◆Sawal: Kya ye sab baaten hadis sharif se saabit hai?

 ◆Jawab: Ye sab bahut saari hadiso se saabit hain jis par imaan rakhna har musalman ke liye zaruri hai.Un hadiso me se kuch hadisen yahan par pesh hain.

 ◆Hadis No.1
:Hazrat-e-Anas radhi allaho anho bayan karte hain ki Huzur ﷺ ne irshad farmaya ki Main Hazrat-e-Musa alaihissalam ki qabar ke paas se guzra to dekha ki woh apni qabar me khade ho kar namaaz padh rahe the

.Ref ( Sahi Muslim,Hadis No.2375.Sunna Nasaee, hadis No.1633)

Is hadis se maloom hua ki Allah ke nabi apni qabron me zinda hote hain aur namaaz padhte hain.

 ◆Hadis No.2: Hazrat-e-Shaddad bin Aus radhi allaho anho bayan karte hain ki Huzur ﷺ ne irshad farmaya ki: Tumhare behtarin dino me se juma ka din hai.Isi din Hazrat-e-Aadm alaihissalam ki takhliq hui.Isi din un ki rooh qabz ki gayi,Isi din soor phonka jaaega aur isi din log be-hosh honge.Is liye is din mujh par khoob darood bheja karo kyunki tumhara darood mujh par pesh kiya jaata hai. Sahaba ne arz kiya:Ya Rasoolallah ﷺ ! Us waqt aap par hamara darood kis tarah pesh hoga jab ki aap mitti ho gae honge?To Huzur ne farmaya ki Allah Ta’ala ne zameen par haraam kar diya hai ki woh nabiyo ke jismo ko khaae

Ref  ( Abu-dawood, hadis No.1047. Ibn-e- Maajah,Hadis No.1085)

Aur Hazrat-e-Abu Darda radhi allaho anho bayan karte hai ki Huzur ﷺ ne irshad farmaya ki:Beshak Allah Ta’ala ne zameen par haraam kar diya hai ki woh nabiyo ke jismo ko khaae.To Allah ke nabi zinda hote hain aur unhe rizq diya jaata hai

.Ref ( Ibn-e-Maajah, Hadis No.1637 )
Is hadis me zara gaur karen!Sahaba ne ye khayal kiya ki inteqaal ke baad Aap ﷺ bhi aam logo ki tarah mitti ho jaaenge.To Huzur ne is khayal ka radd farmaya aur un ke saamne asal haqiqat bayan farmaya ki Allah Ta’ala ne zameen par haraam kar diya hai ki woh nabiyo ke jismo ko khaae.To Allah ke nabi zinda hote hain aur unhen rizq diya jaata hai. Ab jis khayal ko khud Huzur ne radd farmaa diya, agar koi usi ko apna aqeeda bana le to phir woh kaisa musalman hoga?

 ◆Hadis No.3: Hazrat-e-Abu Huraira radhi allaho anho bayan karte hain ki: Huzur ﷺ ne irshad farmaya: Main Hatim e Ka’aba me khada tha aur Quraish ke log mujh se mere Safar-e- Meraj ke baare me sawalat kar rahe the.Un logo ne mujh se Baitul Muqaddas ke baare me kuchh aisi chizen puchhen jin ko main ne mahfuz nahi rakha tha jis ki wajah se main itna pareshaan hua ki us se pehle itna kabhi nahi hua tha.Tab Allah Ta’ala ne Baitul Muqaddas ko utha kar mere saamne rakh diya, Woh mujh se Baitul Muqaddas ke baare me puchhte rahe aur main unhen bata-ta raha.(Meraj ka waqiya bata-te hue Huzur ne isi hadis me bayan farmaya ki) Main ne dekha ki Hazrat-e-Musa alaihissalam khade hue namaaz padh rahe the. Aur woh Qabila Shanowah ke logo ki tarah ghunghriyale baalo wale the.Hazrat-e-Isa ibn-e-Maryam khade hue namaaz padh rahe the aur Urwa bin Masood Saqafi un se bahut mushabeh hai. Hazrat-e- Ibrahim alaihissalam bhi khade namaaz padh rahe the aur tumhare paigambar un se sab se ziyadah mushabeh hain. Phir jab namaaz ka waqt aaya to main ne un sab ambiya-e- Kiraam ki imaamat kiya.Jab main namaaz se faarig hua to ek kehne wale ne mujh se kaha:Ye Malik,Jahannam ke daroga hai.In ko salaam kijiye.Main un ki taraf dekha to unho ne pehle mujhe salaam kiya

Ref ( Sahi Muslim,hadis No.172)
Is ke elawah hadis sharif ki kitabon me Meraj sharif ke baare me bahut saari hadisen hain jin me ye bayan hai ki Aap ﷺ ne alag alag aasmano par ambiya-e-kiraam se mulaqaaten ki.Unho ne aap ko salaam kiya, Mubarak-baad diya. Bilkhusoos Hazrat-e- Musa alaihissalam ne aap ko namaaz me kami karane ka baar baar mashwara diya.In saari hadison se saaf taur par saabit hota hai ki ambiya-e-Kiraam zinda hain.Kyunki Namaaz padhna, Salaam karna, Jama’at me sharik hona aur mashwara dena murdon ka kaam nahi.Ise moti aqal ka aadmi bhi samajh sakta hai.
Is ke elawah Muhaddis imam Baihaqi ne ambiaya-e-Kiram ke zinda hone par Hadis sharif ki ek puri kitaab likhi hai Jis me un hone woh sab hadisen jama kiya hai jis se ambiya-e-kiraam ka zinda hona saabit hota hai.Tafseel ke liye us kitab ko padhe.Ab ham us me se sirf ek Hadis likh kar baat khatam karte hain.

 ◆Hadis No.4: Hazrat-e-Anas radhi allaho anho bayan karte hain ki: Huzur ﷺ ne irshad farmaya ki: Ambiya-e-Kiraam zinda hote hain aur apni Qabron me namaaz padhte hain.

Ref ( Hayatul Ambiya,written by:Imam Baihaqi,Page No.70, Hadis No.1 )

 ◆Sawal :Quran sharif, Surah Zumur,Aayat No.31 me Allah Ta’ala ne Huzur ke liye “Mayyat” ka lafz istemal farmaya jis ka mana hota hai murda.Is se to maloom hua ki Huzur Murda hain?

 ◆Jawab: Woh aayat ye hai “اِنَّکَ مَیِّتٌ وَّ اِنَّہُمۡ مَّیِّتُوۡنَ” Allah Ta’ala ne farmaya ki (Aye Mahboob!) Beshak aap ko inteqaal karna hai aur un
(Kaafiron ) ko bhi marna hai

Ref ( Surah Zumur , aayat No.30 )

Mufassereen bayan karte hain ki is aayat me Allah Ta’ala ne un kaafiro ka radd farmaya jo Aap Sallallaho alaihe wasallam ki maut ka intezaar karte the. Allah Ta’ala ne farmaya ki Aye mahboob! Beshak aap inteqaal karne wale hain. Aur un kaafiro ko bhi hamesha nahi rehna hai balki un ko bhi marna hai. To is aayat me ye bayan kiya gaya ki Huzur ko bhi ek na ek din dunya se jaana hai.Aur ise sab maante hain.Magar is aayat me ye kahan kaha gaya ki Woh mar kar mitti me mil jaaenge.Ya woh aam logo ki tarah ho jaaenge? Ya unhen murda kehna jaa’iz hai.(Tauba)Ye to woh aqeeda hai jis ka radd khud Huzur ne farmaya jaisa ki Hadis No.2 me guzra.
Aakheri baat!Jab

 jang-e-badar me shahid hone wale Sahaba ko kuchh log Murda kehne lage to Allah Ta’ala ne aayat-e-Karima naazil farmaya aur un shahidon ko murda kahne se mana farmaya.Allah Ta’ala ne irshad farmaya:Jo log Allah ke raaste me qatal kiye gaye unhe murda nahi kaho.Balki woh zinda hain magar tumhe khabar nahi hai.

Ref ( Surah Baqra,Aayat No.154 )

 Aur dusri jagah farmaya ki: Aur jo log Allah ke raaste me qatal kiye gaye unhen tum hargiz murda gumaan bhi na karo

Ref (Surah Nisa,aayat No.169 )
Sar ke jism se juda hone aur qabron me dafan kiye jaane ke baad bhi Allah Ta’ala ne hame shahidon ko

 “Murda”Kehne se mana farmaya aur un ki fazilat bata-te hue irshad farmaya ki “Woh zinda hain aur unhen un ke rab ke paas se rozi di jaati hai magar tumhe us ki khabar nahi hai”Yani tum apni zaaheri aankhon se un ko nahi dekh sakte is liye bas yaqeen rakho aur unhen murda mat kaho. kyunki ye tumhare Rab ka hukm hai.Jo galat nahi ho sakta. Ye baat sab jaante aur maante hain ki Koi ummati chaahe woh jis martabe ka bhi ho woh kisi bhi etabaar se

 ambiya-e-Kiraam se aage nahi badh sakta.To Jab aap ﷺ ki ummat ke shahidon ko Murda kehna ya samjhna sahi nahi hai to phir khud Nabiyon ke sardaar ﷺ ko Murda kahna kaise sahi ho sakta hai?

www.nabikibaatein.com